ପୁସ୍ତକ ‘ଲୋକସମ୍ପର୍କ ଓ କର୍ପୋରେଟ୍ ଯୋଗାଯୋଗ’ର ପ୍ରଚ୍ଛଦ ଉନ୍ମୋଚିତ
Bureau,Odishabarta
ଢେଙ୍କାନାଳ: ଭାରତୀୟ ଜନ ସଞ୍ଚାର ସଂସ୍ଥାନ (ଆଇଆଇଏମ୍ସି)ରେ ଆଜି ଅପରାହ୍ଣରେ ସୁସାହିତ୍ୟିକ ତଥା ଗଣମାଧ୍ୟମ ଶିକ୍ଷାବିତ୍ ଡ. ମୃଣାଳ ଚାଟାର୍ଜୀ ଓ ସାମ୍ବାଦିକତାରୁ ଗଣମାଧ୍ୟମ ଶିକ୍ଷା କ୍ଷେତ୍ରକୁ ଆସିଥିବା ସୌମ୍ୟ ରଞ୍ଜନ ବିହାରାଙ୍କ ଦ୍ୱାରା ଲିଖିତ ପୁସ୍ତକ ‘ଲୋକସମ୍ପର୍କ ଓ କର୍ପୋରେଟ୍ ଯୋଗାଯୋଗ’ର ପ୍ରଚ୍ଛଦ ଉନ୍ମୋଚିତ ହୋଇଛି ।
ବର୍ତ୍ତମାନ ସମୟରେ ଲୋକସମ୍ପର୍କ ଗଣମାଧ୍ୟମ ଏବଂ ସମାଜର ଏକ ଗୁରୁତ୍ୱପୂର୍ଣ୍ଣ ଅଙ୍ଗ ହୋଇଉଠିଲାଣି । ଜନମତାମତକୁ ସକାରାତ୍ମକ ଭାବେ ପ୍ରଭାବିତ କରିବାରେ ଏବଂ ଏକ ଅନୁଷ୍ଠାନର ଭାବମୂର୍ତ୍ତିକୁ ଉଜ୍ଜ୍ୱଳ କରି ରଖିବାରେ ଏହାର ଆବଶ୍ୟକତା କ୍ରମଶଃ ଅଧିକ ଅନୁଭୂତ ହେଉଛି । ଅର୍ଥନୀତିର ଅଗ୍ରଗତି ସହିତ କର୍ପୋରେଟ୍ ଯୋଗାଯୋଗ ମଧ୍ୟ ଏକ ସ୍ୱତନ୍ତ୍ର ବିଷୟ ଓ ପେସା ଭାବରେ ଉଭା ହେଲାଣି । ଏସବୁ ଦୃଷ୍ଟିରୁ ବିଚାର କରିଲେ ଓଡ଼ିଆ ଭାଷାରେ ଏ ବିଷୟରେ ଏଯାଏ ବେଶି ପୁସ୍ତକ ଲେଖାଯାଇନାହିଁ । ସେ ଅଭାବକୁ ଏ ପୁସ୍ତକଟି କିଛି ମାତ୍ରାରେ ଅନ୍ତତଃ ଦୂର କରିପାରିବ ବୋଲି ପୁସ୍ତକର ଲେଖକ ଡ. ମୃଣାଳ ଚାଟାର୍ଜୀ କହିଛନ୍ତି । ଖୁବ୍ଶୀଘ୍ର ପୁସ୍ତକଟି ଉନ୍ମୋଚନ ହେବ ବୋଲି ସେ ସୂଚନା ଦେଇଛନ୍ତି ।
ପୁସ୍ତକରେ ଲୋକସମ୍ପର୍କର ଇତିହାସଠାରୁ ଆରମ୍ଭ କରି ଏହାର କ୍ରମବିକାଶ, ଭାରତ ତଥା ବିଦେଶରେ ଏହାର ବ୍ୟବହାର, ଲୋକସମ୍ପର୍କର ବିଭିନ୍ନ ମଡେଲ୍ ଓ ଥିଓରୀ, ବିଭିନ୍ନ ଆଇନଗତ ଓ ନୈତିକ ଦିଗ, ବ୍ୟାବହାରିକ ଦିଗ ଆଦିର ଆଲୋଚନା ହୋଇଛି । ଏହାସହ ଲୋକସମ୍ପର୍କର ବିଭିନ୍ନ ଉପାଦାନ, କୌଶଳର କଥା ମଧ୍ୟ ରହିଛି । ସେହିପରି କର୍ପୋରେଟ୍ ଯୋଗାଯୋଗ ଓ ବିପତ୍ତି ପରିଚାଳନା ଉପରେ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ରହିଛି । କୋଭିଡ୍-୧୯ ପରି ବିପତ୍ତିର ପରିଚାଳନା ସହ ଅନ୍ୟ କେତୋଟି କେସ୍ ଷ୍ଟଡି ରହିଛି । ସାମାଜିକ ଗଣମାଧ୍ୟମ କିପରି ଲୋକସମ୍ପର୍କ ପାଇଁ ଗୁରୁତ୍ୱପୂର୍ଣ୍ଣ ହୋଇଉଠିଛି, ସେ ସମ୍ପର୍କରେ ମଧ୍ୟ ଆଲୋଚନା କରାଯାଇଛି ।
ଏ ପୁସ୍ତକଟି ପ୍ରକାଶ କରୁଛନ୍ତି ଶେଫାଳି କମ୍ୟୁନିକେଶନ୍ସ । ପୁସ୍ତକର ଅଗ୍ରୀମ ବୁକିଂ ଉନ୍ମୋଚନର ଦଶ ଦିନ ପୂର୍ବରୁ ଆରମ୍ଭ ହେବ ବୋଲି ପ୍ରକାଶନ ସଂସ୍ଥା ପକ୍ଷରୁ କୁହାଯାଇଛି । ଏଥିପାଇଁ [email protected]ରେ ମେଲ୍ ଯୋଗେ ଯୋଗାଯୋଗ କରିହେବ ।
